Niks lik verplichter…dan de rol van stadsdichter

Freddy Mensink
Niks lik eigenlijk verplichter
Dan de rol van stadsdichter

Tot an vedaag was mien leav’n één en al lol en vertier
Mèr vanôf non….. alleen nog mèr pen en papier

Gen tied mear vuur wat dan ôk,
Alleen met dicht’n nog drok, drok, drok

Zo’k noa vedaag nog wa röstig kunn’n sloap’n ?
En nig ’n heel’n nacht met ’n schriefblok duur ’t hoes hen loop’n ?

En hoe mot het toch straks met mien Ruut’ms dialect ?
Dat vuur mie aait vanzölf geet en zo lekker bekt

Zo van ’t werk, ’t verk’n, en ’n Kuperberg
Proat ik straks oawer wark, ’t vark’n en ’n Kuperbarg ?

En….kan’k straks ôk nig mear duur de vuurduur hèn ?
Umdat het deur de veurdeur mot wèn ?

Ok de nacht van de Nachtegaal geet dit joar vast nig duur,
Want as stadsdichter goa’k DOAR alleen mer vuur.

Zo zal het leav’n op de Vink ok onmeunig veranner,
Het grös meaj’n, nou dat dot straks mer mooi nen anner.

Misschien kost het mie zelfs oeteindelijk nog de dood,
Al schrievend en nig oplettend…mill’n op stroat

Echt leu, alles lik lichter,
Dan an de gang as stadsdichter.

Mèr…………….blijkbaar is het aal toch wa te doan,
Marian oude Elberink hef het met glans duurstoan.

Dus ik goa de oetdaging ôk mèr is an,
En dan möj mèr hôpp’n, dat ik d’r wat van kan.

Het is trouwens een hele eer, besef ik mie goad,
Dus vanôf vedaag goa’k literair met de billen bloot !

Freddy Mensink 26 maart 2018

Niks lik verplichter…dan de rol van stadsdichter